You are currently viewing پروفیسر صبادشتیاریءِ سیمی سالروچ

پروفیسر صبادشتیاریءِ سیمی سالروچ

  • Post category:News

3rdپروفیسر صبادشتیاریءِ سیمی سالروچ ءِ درگتءَ یک پرمڑاھیں دیوانے ماں ملیر ءَ برجم دارگ بوت

محمد بیگ بیگل ءَ بلوچی زبانءَُ لبزانکءِ ھزمت ءِ مُز ءَ ’’پروفیسر صبادشتیاری شیلڈ ‘‘دیگ بوت

چہ ’’سید ھاشمی ریفرنس کتابجاہ‘‘ملیر ءِ نیمگءَ پروفیسر صبادشتیاریءِ سیمی سالروچ ءِ درگتءَ یک پرمڑاھیں دیوانے’’پروفیسر صبادشتیاری؛ پگر ءَُ فلسفہ ‘‘ءِ سرحال ءَ ماں ملیر ءَ برجم دارگ بوت۔دیوان ءِ پاگواجہءِ نندجاہءَ پروفیسر صبادشتیاریءِ عکس ایر کنگ بوت۔دیوانءِ سے بہر ات انت ’’صبادشتیاریءِ زند ءَُ ازمءِ سرءَ پٹ پولی نبشتانک، اسٹیج کسمانک، شاعری ‘‘۔دیوان ءِ بنگیج گوں پاکیں کلام ءِ تلاوت ءَ نوشاد بلوچ کت ۔ مراگش ءِ بندات ءَ غلام رسول بلوچ ءَ کتابجاہ ءِ مول ءَُ مراد دیوان ءِ دیم ءَ پیش کت انت ۔مراگشءِ اولی بہر ءَ نامداریں کوّاس ءَُ زانتکاراں پروفیسر صبادشتیاریءِ زندءِ علمی ءَُ لبزانکی تک ءَُ پہناتانی سرءَ وتی حیال ءَُ لیکہ درشان کت انت۔ نامداریں وشکندنویس ئیں نویسکار واجہ محمد بیگ بیگل ءَ پہ پروفیسر صبادشتیاریءَ سِتک درشان کنانءَ گْوشت کہ شہید صبادشتیاریءِ مستریں جواناکی ایش ات کہ آ مُسامداریں مردمے اَت ۔ ھمے مُسام آئیءِ گوں بلوچ راج ، بلوچ ڈیھ، بلوچی زبان ءَُ لبزانک ءَ ات۔ واجہ صبادشتیاری گوں دلستکیءَ بلوچی زبان ءَُ لبزانکءِ ھزمت کت ۔بلوچستان دانشجاہ ءِ استادءَُ پٹ پول کار واجہ رحیم مہر ءَ صبادشتیاریءِ ازمی کارانی سرءَ وتی حیال درشان کنان ءَ گْوشت کہ ایمانداری ءَُ دلستکیءَ واجہ صبادشتیاریءَ بلوچی زبان ءَُ لبزانک ءِ ھزمت ءِ گرانیں بار وتی کوپگاں زرت۔ آئیءَ گْوشت کہ دلستکی ءِ پجّیءَ واجہ ءَ اولی رند ءَ بلوچ چاگرد گوں سائنسی رنگ ءَ پٹ پول کاریءَ ھم گْرنچ کتگ۔ واجہءِ پہ زبان ءَُ لبزانکءَ واجہ ءِ پٹ پول کاری ءِ لڑ سک دْراج انت ۔ چہ شالکوٹ ءَ آتکگیں واجہ صبادشتیاریءِ شاگرد بالاچ بالی ءَ گْوشت کہ استاد صبادشتیاری ایماندارءَُ دلستکیں مردمے بوتگ ھمک لیکہ ءِ مردماں آ وتی استاد منّتگ آیک درویش ءَُ مردم شناسیں انسانے بوتگ ۔بانک مریم بلوچ ءَ گْوشت کہ استاد صبادشتیاری استادانی استاد بوتگ ۔ واجہ چہ ھما مردماں یکے بوتگ کہ آ استاد ءِ لبزءَ کرزیت ۔ مراگشءَ غلام رسول بلوچ ، بانک شریفہ شمبےءَُ ایسیان بی بی ءَ ھم استاد صبادشتیاری ءِ زندءِ سرءَ وتی حیال ءَُ لیکہ درشان کت انت ۔ غلام رسول بلوچ ءَ چہ کتابجاہ ءِ نیمگءَ بلوچی زبان ءَُ لبزانک ءِ ھزمت ءِ مُزءَ پروفیسر صبادشتیاری ءِ نامءِ یک یادگاری شیلڈے واجہ محمد بیگ بیگل ءَ دات۔ اے گپّ زانگ بہ بیت کہ کتابجاہ ھمک سال بلوچی زبان ءَُ لبزانک ءِ ھزمت ءِ مُز ءَ یک نامینتگیں نویسکارے ءَ شیلڈدنت ۔اولی بہر ءِ گڈسرءَ کتابجاہ ءِ کارمستر ڈاکٹر رمضان بامری ءَ تران کنان ءَ گْوشت کہ مروچی اے روچ ھما سیاھیں روچ انت کہ مئے یک مزنیں زانتکارے چہ ما جدا کنگ بوت آئیءَ گْوشت کہ مارا ایوکا وش گپّی وشیں جار زیب نہ دینت بلکیں ما ھما کارءَ دیمءَ بہ برئیں کہ واجہ شہید صبادشتیاریءَ بنگیج کتگ ما آئیءِ پگرءَُ فلسفہءَ دیمءَ بہ برئیں۔ مراگشءِ اے بہر ءَ وش نیوز چینل ءِ مستر واجہ احمد اقبال ءَ چہ ’’وژن گوادر ‘‘ءِ نیمگءَ پہ کتابجاہ ءَ دہ ھزار گز زمین ءِ کاگد کتابجاہءِ کارمستر ءِ دست ءَ انت ۔ واجہ احمد اقبال ءَ کتابجاہ ءِ دہ سال سرجم بوگءِ مراگشءَ جارھمے زمین ءِ دیگ ءِ جار جتگ ات ۔ مراگش ءِ دومی بہر ءَ چہ تھیٹر کمیٹی ءِ نیمگءَ یک اسٹیج کسمانکے پیش ’’قندیل‘‘ءِ نامءَ پیش کنگ بوت کہ مردماں سک باز دوست ۔ گڈسری بہر شاعری ءِ دیوان ات کہ ظفر کریم،غلام رسول کلمتی ،شرف شاد،اسحاق خاموش ، حسن علی حسن، سراج رحیم ، چندن ساچ ، نبیل نور ءَُ دگہ ورنائیں شاعراں وتی شعر ءَُ پر بند ونت انت ۔ اول دوبہرانی جارچین حامد بلوچ ات ءَُ شاعری بہر ءِ جار چین حمل پرویز ات۔ دیوانءَ کراچی ءِ پجّیءَ بلوچستانءِ دور ءَُ دراجیں ھند ءَُ دمگاں ھم مردماں آتک ءَُ زرتگ ات۔ دیوان شپءِ ساعت ھشت ءَ وتی آسر ءَ رست۔