کتابجاہ ءِ دہ سالانی نگدال ،زانتکار ءُ کواسانی مارشت ، بلوچی بنگیجی ءُ سرٹیفکٹ کورسانی داد، لچّہ ءُ دستونکانی دیوان
سیدھاشمی ریفرنس کتابجاہ ءِ دہ سالانی سرجمی ءِ درگتء یک پُرمڑاھیں دیوانے یک شمبے، ۵ جنوری ۲۰۱۴م ء ماں نیشنل میوزیم آڈوٹوریم ء وش نیوز چینلءِ کمک ء برجم دارگ بوتگ ۔ دیوان ءِ سے بہر بوتگ انت ۔ اولی بہر کتابجاہءِ دہ سالانی دیمروی نگدال ءُ گشتانک ، دومی بہرداد دیوان ءُ سیمی بہر شعر ءُ شاعری ئیگ ات۔ دیوان چہ پاکیں کلام ء وانگء بندات بوت کہ اے شرپ بانک سمّی بلوچ ء زرت۔ اولی بہرء کتابجاہءِ کارگشاد غلام رسول بلوچء مہمانانی دیمء دہ سالانی سرجمیں نگدال یے پیش کت ۔ آئیء پد سلمان بلوچ ء ۲۰۱۳م ءِ مالی جاورءُ نگدال گْوشت انت ۔نگدالاں پد کتابجاہ ءِ کمک کار مستر بانک مریم بلوچ ء چہ دور ءُ دراج ء آتکگیں مہمان وش آتک کت انت ءُ آئیانی منّت گپت ۔ ایشاں پد ڈاکٹر حمید بلوچء وتی گشتانکءِ تہء گْوشت کہ پہ بلوچ راج ء کتابجاہءِ وڑیں ادارہ یے ءِ جوڑ کنگ ءِ فیصلہ ھماوھدء دیمء آتک کہ وھدے پروفیسر صبادشتیاریء بلوچی شونانک(انڈکس)ءِ سرء کار بنگیج کت ۔پرچاکہ آ زمانگ ء گیشتریں لبزانکی مڈّی شنگ ءُ شانگ اتنت ءُ یکجاگہء دست کپگء نہ اتنت۔ھما پیشبندی مروچی نہ ایوکا سرجمیں ادارہ یے ءِ شکلء مئے دیمء موجود اِنت بلکیں آئیء وتی دہ سال ھم سرجم کتگ ۔البت پروفیسر صبادشتیاریءِ شہادت ء پد بازیں جنجال آتکگ انت بلے ادارہ ءِ اگدہ دارانی ھمت ءُ دلستکی اِنت کہ اے کار دیمء روان اِنت، آئیء گْوشت کہ انسائیکلو پیڈیا نہ ایوکا یک دراج کشّیں پروجیکٹ یے بلکیں پہ آئیء مزنیں مالی وسیلہ یے ھم پکار اِنت بلے اے رِدء اگاں مئے گام سست انت بلے دیمء جنزان ایں ۔ ڈاکٹر گل حسن بلوچ ء کتابجاہءِ دہ سالانی دیمروی ساڑات ءُ دہ سالانی سرجمیء مراد باتی دیان ء گْوشت کہ واجہ صبادشتیاریءِ جوڑ کتگیں ادارہ ناں ایوکا چندے کتاباں چنگءُ پہریزگءِ نام انت بلکیں واجہ صبادشتیاریء اے ادارہ بلوچ ءِ زبان ء پہریزگ انت، مئے درستانی اے ذمہ واری انت کہ پہ بلوچی زبانء کار کنوکیں اے ادارہ ءِ کمک بہ بئیں۔ ڈاکٹر امان اللہ گچکیء گچکیء گْوشت کہ اولی رند انت کہ یک ھنچیں ادارہ یے ھست کہ آ پہ بلوچی زبان ءِ کورس کنائینگء انت ءُ سند ھم دیگ ء انت۔ آئیء گْوشت کہ چد ءُ پیسر ھچ چوشیں ھچ وڑیں ادارہ نہ بوتگ ، اگاں کسے ء بلوچی وانگ ءِ ھُب بوتگ گڈاآئیء وت سرء سرجتگ ءُ ھیل کتگ۔ ڈاکٹر محمد اسلم کُردء وتی گشتانک ءِ گْوشت کہ مئے مہلوک دنیگت پٹ پولءِ ارزشء سرپد نہ انت ، آئیء گْوشت کہ پہ بلوچ ءُ بلوچی ء پٹ پولءِ اولی ھشت واجہ عزیز مگسیء ایر کتءُ اے رِد ء اے دومی ھِشت اِنت کہ واجہ صبادشتیاریء ایر کتگ ۔ وش نیوز ءِ کارمستر احمد اقبال ء وتی مارشان کنان گْوشت کہ عظیم دہکان لکّ ستا کرزیت کہ آئیء چہ وتی ڈگارء یک جاگہ یے پہ بلوچ راج ء ندر کت ءُ مروچی آ جاگہ بلوچ راج ءِ یک مزنیں ادارہ یے جوڑ بوتگ ۔ آئیء گْوشت کہ پہ وش نیوزء اے مزنیں شرپ یے کہ آھم مروچی گوں اے ادارہ ء ھمگام اِنت ۔ آئیء چہ وش نیوز ءِ نیمگء پہ کتابجاہءِ کمکء سالءِ یک لکّ ھشتاد ھزار کلدار دیگ ءِ جارءِ پجّیء اے جار ھم جت کہ چہ آئیء نیمگء ’’وژن گوادر‘‘پروجیکٹ ء دہ ھزار گز زمین سید ھاشمی ریفرنس کتابجاہ ء دنت کہ آیوکیں وھدء اودء یک علمی بنجاہ یے جوڑ کنگ بہ بیت ۔دیوان اولی بہر ءِ گڈ سرء کتابجاہءِ کارمستر ڈاکٹر رمضان بامری ء کتابجاہ ءِ اڑ جنجال ءُ آیوکیں وھدءِ پیش بندی مہلوک ءِ دیمء درشان کت انت ءُ مردمانی آیگ ءِ منّت گپت ۔
مراگشءِ دومی بہربلوچی بنگیجی ءُ سرٹیفکٹ کورسء سوبمند بوتگیں نودربراں داد ءُ سند دیگ ئیگ ات۔ چہ کتابجاہ ءِ نیمگء اولی ، دومی ءُ سیمی باجاں (Position)آتکگیں نودربراں تمگہ دیگ بوتگ ۔ اولی باجاں آتکیں بنگیجی ءُ سرٹیفکٹ کورسءِ نودربراں تلاھی تمگہ ، پہ دومی باجاں آتکگیں نودربراں پہ نگرہی تمگہ ءُ سیمی باجاں آتکگیں نودربراں برنجی تمگہ دیگ بوت۔ ھمے وڑء چہ وش نیوز ءِ کارمستر احمد اقبال ءُ اویس اقبال ءِ نیمگء اولی ، دومی ءُ سیمی باجاں آتکگیں نودربراں وش نیوز ءِ جوڑ کتگیں شیلڈ ءُ داد ھم دیگ بوت۔ اولی دومی ءُ سیمی باجاں آتکگیں نودر برانی تہء مشکے ، تربت ءُ پیشکان ءِ نودربر ھوار انت ۔ سندانی بہر ءُ بانگ ء احمد اقبال، اویس اقبال، ڈاکٹر امان اللہ گچکی ، ڈاکٹر حمید بلوچ ، ڈاکٹر گل حسن ، غلام رسول کلمتی ءُ بانک شریفہ ء بہر زرت۔
دیوان ءِ گڈسری بہر شاعری ئیگ ات ۔ اے بہر ءِ گچینی مہمانان ءُ شاعرانی تہء ظفر کریم ، ڈاکٹر اسلم کُرد، احمد اقبال ءُ اسحاق خاموش ھوار اتنت ۔دگہ شاعراں کہ وتی لچّہ ءُ دستونک دیوانءِ دیمء وانت انت آیانی نام چوش انت : حمل پروز ،چندن ساچ، رحمان آزگ، حسن علی حسن ، شاکر شاد، وسیم وارث ، سفر احسان، سراج رحیم ،عزیز ارمان ، عبدالعزیز زیبل، نبیل نور، پرواز حکیم، نور جان بلیدہی ، مختار نور، قاسم دشتی ، شاکر ، سیف آزاد، ایسیان بی بی ، فصیلہ بی بی ، عارفہ بی بی ءُ بی بی سمُّل کلمتی۔
جارچینی ءِ ڈُبّہ بشیر واحد ءُ ھمّل پروزء زرتگ ات۔دیوان ء چہ ملیر ، لیاری، گولیمار، کاٹور،گڈاپ ، شراپیءِ پجّیء بلوچستان ءِ دیر ءُ ھندانی مردماں ھم مزنیں کچے ء بہر زرتگ ات ۔ دیوان شپ ءِ ساعت ھپت ء آسر بوت۔
