سید ھاشمی ریفرنس کتابجاہءِ ھمک دوسالاں پد سرمجلس ءِ گچین کاری بنت ءَُ ماہے ءَ پد نوک گچین بوتگیں سرمجلس ءِ سوگندی دیوان برجم دارگ بیت ۔ کہ اے دیوان یک نامداریں شاعرےءِ نامءَ ایر کنگ بیت۔ دودانی پدا سید ھاشمی ریفرنس کتابجاہءِ نوک گچین بوتگیں سرمجلس ءِ سوگندی دیوان 25فروری 2017مءَ ، شمبے ءِ روچ ءَ ماں ملیر ءِ یک ھالے ءَ برجم دارگ بوتگ ات۔سوگندی دیوان بلوچی زبانءِ نامداریں شاعر جی آر مُلّا ءِ نامءَ ایر کنگ بوتگ اَت۔دیوانءِ سے بہر اَتنت ۔ اولی بہرءَ سرمجلس ءِ نوک گچین بوتگیں اگدہ دارءَُ صلاح کار کمیٹی ءِ باسکاں سوگند زُرت۔ سوگندی بہر بلوچی گچین کار کمیٹی ءِ کماش زبانءِ نامداریں پٹ پول کارءَُ نبشتہ کاررحیم مہر ءِ سروکی برجم دارگ بوت۔ رحیم مہرءَ چہ نوک گچین بوتگیں اگدہ دار ءَُ صلاح کار کمیٹی ءِ باسکاں سوگند زُرت۔
دومی بہر ءَ بلوچی زبانءِ نامداریں کوّاس ءَُ زانتکاراں جی آر مُلّا ءُ ماتی زبانانی میاں استامانی روچ ءِ سرا وتی حیال ءَُ لیکہ درشان کت انت۔ چہ درستاں پیسر کتابجاہ ءِ کمک کارمستر مزن ڈاکٹر پروفیسر رمضان بامری ءَ ماتی زبان ءِ ارزش ءِ سرا وتی لیکہ ونت ءُ ڈاکٹر رمضان ءِ لیکہ ءَ پد نامداریں شاعر اسحاق خاموش ءَ جی آر مُلا ءِ زندءِ تک ءَُ پہنات ءَُ آئیءِ شاعری ءِ تکءَُ پہنات ءِ سرا وتی حیال درشان کت انت ۔ اسحاق خاموش ءَ پد نامداریں شاعر بشیربیدارکہ دیوانءِ گچینی مہمان اَت آئیءَ جی آرمُلا ءِ تْرانگ ءِ سرحال ءَ گوں آئیءِ جندءَ گْوازینتگیں روچانی سراوتی حیال درشان کت انت ۔ اے بہر ءِ گُڈّسرادومی گچینی مہمان ءَُ بلوچی لبزانکءِ پڑءَ نامداریں نام اے آردادءَ جی آرمُلا ءِ شاعریءِ تک ءَُ پہنات ءَُ آئیءِ شاعری تیکنیکءِ سرا جْوانیں وڑے وتی حیال ءَُ مارشت درشان کتنت۔ اے بہرءِ جارچین بشیر بلوچ ات۔ دومی بہرءِ گڈسرا راجی ءَُ چاگردی سروک کہ آیاں وہد پہ وہد کتابجاہ ءِ اگدہ دارانی دلبڈّی کتگ، آیاں چہ کتابجا ہءِ نیمگا شرپی ٹیکی دیگ بوتگ ۔ اے واجکارانی تہا سلمان عبداللہ مراد ، (چیئرمین ڈسٹرکٹ کونسل ملیر)احمد اقبال(وش نیوز) ، جان محمد بلوچ ( چیئرمین ڈی ایم سی ملیر)،گل حسن کلمتی، قادربخش بلوچ، صالح محمد ءَُ مبارک بلوچ نام ھوار اَنت۔
شرپی ٹیکیءَ پد یک سوگندءِ نامءَ یک کسمانکے نعمان اختر ءَُ نبیل نورءِ سروکیءَ ماسٹر امام بخش تھیٹرءِ ورنائیں ازم کاراں سوگندءِ نامءَ یک اسٹیج کسمانکے پیش کت ءَُ مہلوکءَ اے کلوہ دیگءِ جہد کت کہ سوگند چےءَ گْوشنت ءَُ سوگندءِ پاسداری چون بیت۔
اے بہرانی گڈسرا نوک گچین بوتگیں کارمستر غلام رسول بلوچ ءَ آیوکیں مردمانی منّت گپت انت ۔
دیوانءِ گُڈسری بہر سازءَُ زیمل ءِ بہر اَت کہ آئیءِ تہا نامداریں گشندہاں جی آر مُلا ءِ شاعری گوں سرءَُ سازاں الہان کت انت۔ گشندہانی تہا بلوچی زبانءِ نامداریں گشندہ نورمحمد نورل ، ھارون شیخ، خانصاحب غلام محمد، آسمی بلوچ، وہاب بلوچ ، سلیم بلوچ ، عقیل بلوچ ءَُ کساں سالیں جمالءَ دیوان گوں سازءَُ زیملاں براہ دارکت۔ اے بہر ءِ جارچین حامد بلوچ ءَُ حمل پرویز اتنت۔ پہ دیوان ءِ برجم دارگ ءَ سلمان عبداللہ مراد ءَ کمک کتگ۔
دیوانءَ چہ کراچیءَ ابید دیرءَُ دراجیں شہراں مردماں بہر زُرتگ ات ءَُ نیٹ ءِ وسیلہ ءَ مُلک ءَُ در مُلکءَ بازیں مردماں تچکا چارتگ۔ دیوان داں شپءِ دہءَُ نیمءَ آسر بوت۔
