سیدھاشمی ریفرنس کتابجاہ ءِ سوگندی دیوان ، ماتی زبانانی میان استمانی روچ ءِ درگتء نبشتانک ، براھیم جوانسال بگٹیءِ یاتء سازءُ زیملی دیوان، دودءُ زانشی کسمانکُک پیش کنگ بوتگ انت۔

سید ھاشمی ریفرنس کتابجاہ ءِ سوگندی دیوان ، ماتی زبانانی میان استمانی روچ ءِ درگتء گشتانک،بلوچی زبان ءِ نامداریں شاعربراہیم جوانسال بگٹی ءِ یاتء ساز ءُ زیمل ءُ اسٹیج کسمانکک پیش کنگ بوتگ انت ۔ سید ھاشمی ریفرنس لائبریری کا ششمی سوگندی دیوان ۲۱فروری ء داسوروپڑ(اولڈتھانہ)ملیر ء برجم دارگ بوت ۔ دیوان ءِ بنگیج چہ پاکیں پروردگارءِ نام ء نوشاد عبدالصمد ء کت۔ دیوان چار بہرانی تہء بہر ات ۔ اولی بہر ء گچین کار کمیشن ءِ سروک عبدالرؤف بلوچ ء چہ سرمجلس ء نوک گچین بوتگیں اگدہ داراں سوگند زُرت۔سوگندی بہر ء پد ماتی زبانانی میان استمانی روچ ءِ درگتء ماتی زبانءِ ارزش ، بلوچی زبانءِ تک ءُ پہنات، ھستیں دؤر ء ماتی زبانءِ بستار ءُ مانشولی دِرکءُ دؤرء کجام زبان وتء پشت گیجیت ءِ سرحال ء غلام رسول بلوچ ، چندن ساچ ، ایسیان بی بی اور فضیلہ بی بیء وتی پٹ پولی نبشتانک ونت انت۔ بلوچی زبانءِ نامداریں شاعر براہیم جوانسال بگٹی ءِ زندءُ ازم ءِ سرء پروفیسر غلام نبی ساجد بزدار ءِ پٹ پولی نبشتانک پیش کنگ بوت ،دزگٹیانی سبب ء پروفیسر غلام نبی وت آتک نہ بوتگ ات ، آئیءِ نبشتگیں نبشتانک غلام رسول کلمتی ء ونت۔ اے بہر ءِ گڈسرء کتابجاہءِ کارمستر ڈاکٹر رمضان بامری ء چہ دُورءُ دراجء آتکگیں مہمانانی منّت گپت انت ۔ دیونءِ سیمی بہرء دو اسٹیج کسمانک پیش کنگ بوت۔ اوّلی کسمانک سمّل کلمتی ءُ آئیءِ دزگُہاراں ماتی زبانءِ ارزشءِ سرء پیش کت۔دومی کسمانک سراج رحیمءُ علی نواز ولی ء ’’بلوچ دودءِ پاسپان دودا ‘‘ءِ نام ء پیش کت۔سرجمیں دیوان اوشتات ءُ آیاں ازم گرسکّ بازدلبڈّی دات انت۔دیوان ءِ گُڈّی بہر سازءُ زیملی بہر ات کہ اے بہر ء کراچیءِ پجّیء چہ بلوچستانءِ دُورءُ دراجیں ھنداں ھم گشندہاں بہر زرت۔ گشندہانی تہء بلوچی زبانءِ نامداریں گشندہ اُستاد نورمحمد نورل، تاج بلیدہی ، نبی بخش بگٹی ، آسمی بلوچ، غلام محمد خانصاحب، قاسم ھامین، ھارون شیخ، ابراہیم ایمن ، مولابخش ملیری ، عقیل بلوچ، محمد سلیم ، وھاب بلوچءُ جمیل بلوچ ء گوں وتی وشیں الہاناں دیوان براہ دار کت۔ دیوانءِ جارچینی ءِ ڈُبّہ عظیم دہکان،حمل پرویز ، حامد بلوچ ءُ راحیلہ بلوچ ء گون ات۔دیوانء ملیر ، لیاری ، گولیمار، گڈّاپ ءُ چہ بلوچستان ءِ دُور ءُ دراجیں ھنداں مردمانی مزنیں کچّے ء بہر زرتگ ۔